Еліміздегі үшінші мегаполисте «Жайлы мектеп» ұлттық жобасын іске асыру мақсатында 2025 жылға дейін 28 мың орындық 18 мектептің құрылысын жүргізу жоспарлануда. Осы мақсатта 10 700 орындық алты бірдей мектептің құрылысы 2024 жылы басталады деп көзделініп отыр.
Қазір қала аумағында 18 білім нысанының орны анықталған.Оның ішінде, Абай ауданында - 7, Әл-Фараби ауданында -1, Еңбекші ауданында - 2, Қаратау ауданында - 6, Тұран ауданында - 2 мектептің құрылысы бекітілді. Бүгінгі таңда 13-нің жер учаскесіне мемлекеттік акт алынған. Ал, қалған 5 нысанның жер учаскесі бойынша тиісті жұмыстар жүргізілуде. Сәулет, қала құрылысы және жер қатынастары басқармасы 4 ғимараттың құрылысына бөлінген жер телімдерін мемлекет мұқтажына алу үшін тиісті шараларды атқаруда.
Жоспарланған 18 мектеп құрылысы пайдалануға берілген жағдайда жаңадан ашылған шағын аудандардың және сынып толымдылығы жоғары мектептер мәселесі толығымен шешілетін болады. Сонымен қатар, қосымша 2 579 педагог жұмыспен қамтылады.Жобада жайлы мектептің ерекшеліктері бекітілген. Мәселен, бастауыш және жоғарғы сыныптарға арналған ғимараттың жеке блоктары болады, пәндік кабинеттердің толық жиынтығы, еңбекке баулуға арналған әмбебап шеберханалар мен студиялар заман ағымына сай жабдықталады. Қала берді білім ұяларындағы спорт залдар мен асханаларда, арнайы кабинеттерде қауіпсіздік жүйелері де мықтап қамтылған.