Маңғыстау облысында жыл басынан бері 883 мас жүргізушінің жолы кесілді, деп хабарлайды kazlenta.kz тілшісі Polisia.kz сайтына сілтеме жасап.
Маңғыстау облысында жыл басынан бастап 10 ай ішінде көлік құралын алкогольдік масаң күйде басқарған 883 жүргізуші анықталды. Аталған құқық бұзушыларға қатысты Қазақстан Республикасы Әкімшілік құқық бұзушылық туралы кодексінің 608-бабы бойынша әкімшілік хаттамалар толтырылды. Заңға сәйкес, олар 7 жыл мерзімге көлік құралын басқару құқығынан айырылып, 15 тәулікке дейін әкімшілік қамаққа алу жазасы қолданылды. Сонымен қатар осы кезеңде алкогольдік масаң күйде көлік құралын басқару құқығынан айырылғанына қарамастан, қайтадан мас күйде рөлге отырған 50 адам анықталды.
Аталған деректер бойынша Қазақстан Республикасы Қылмыстық кодексінің 346-бабымен қылмыстық істер қозғалды. Рөлге отырған әрбір жүргізуші өз өміріне ғана емес, өзгелердің де өміріне жауапты. Мас күйде көлік басқару – орны толмас қайғыға бастайтын қауіпті қадам. Осыған байланысты полиция қызметкерлері жүргізушілерді жол қозғалысы ережелерін қатаң сақтауға, көлік құралын алкогольдік масаң күйде басқармауға шақырады.