ҚР Премьер-Министрінің орынбасары Тамара Дүйсенованың төрағалығымен өткен кеңесте Астанада азаматтарды жұмыспен қамтуға белсенді түрде жәрдемдесу жөніндегі «Joltap» жобасының іске асырылу барысы қаралды. Оған орталық мемлекеттік органдардың, республикалық маңызы бар қалалар, Ақтөбе және Қарағанды облыстары әкімдіктерінің өкілдері қатысты, деп хабарлайды kazlenta.kz.
Бұл жоба қалаға тұрақты табыс іздеп келген, бірақ жақсы орын таба алмаған немесе уақытша жұмысқа орналасқан адамдарды тұрақты жұмысқа тұрғызуға көмектеседі. Жоба аясында елордада 11 кеңес беру бөлімі жұмыс істейді. Олар жұмыспен қамту орталықтарында емес, адамдар көп жиналатын жерлерде, соның ішінде базарларда, сауда және іскерлік үйлерде орналасқан. Мамандар азаматтарға мемлекеттік қолдау шаралары туралы кеңес береді, қажет болған жағдайда жұмысшы мамандықтарына қысқа мерзімді тегін оқыту курстарын ұсынады. Бұл жағдайда негізгі назар практикалық сабақтарға аударылады. Бұл процеске қызметкерлерді іздеп жүрген кәсіпкерлер де қатысады.
Айта кету керек, жоба тек оқытуды ғана емес, жұмысқа орналасуға дейін толық циклды көмек көрслетуді де қарастырады. Азаматтарға ыңғайлы болу үшін 8 мың адам пайдаланатын «Jumys tap» телеграм-боты құрылды.
«Жобаны іске асыру басталғаннан бері 9 мыңнан астам адамға кеңес берілді. 3,5 мың азамат мемлекеттік қолдау шараларына өтінім берді. 2 мыңнан астам адам қысқа мерзімді курстардан өтті. 1,5 мың азамат жұмысқа орналастырылды. Олардың кейбіреулері қызмет көрсету, сауда-саттық, тігін тігу салаларында жұмыс істейді, ал басқалары тамақтану орындарынан жұмыс тапты. Жұмысқа орналасқандардың жартысынан көбі жастар екенін атап өткім келеді», — деді Астана әкімінің орынбасары Евгений Глотов.
Жобаның жоғары нәтижелілігін атап өтіп, Тамара Дүйсенова осы тәжірибені тарату қажеттігін атап өтті. Оның айтуынша, адамның жұмыспен қамту орталығына келуін күтпей, проактивті түрде әрекет ету қажет: еңбек нарығындағы жағдай мен мемлекеттік қолдау шаралары туралы алдын ала хабардар етіп, сондай-ақ жұмысқа орналасуға жәрдемдесу қажет.
«Қазір ірі қалалардағы кейбір жастар уақытша жұмыс орындарынан ақша табуға мәжбүр. Қайда бару керектігін білмейтіндер де бар. Сондықтан Астанадағы тәжірибені басқа өңірлерге енгізу қажет. Қысқа мерзімді оқыту кезінде жергілікті еңбек нарығының сұранысын ескеру қажет. Жастарға ерекше назар аудару қажет», — деді вице-премьер.
Еліміздің басқа да мегаполистерінде, сондай-ақ Ақтөбе және Қарағанды облыстарында азаматтарды жұмысқа орналастыру бойынша жергілікті жобалар іске асырылуда. Сонымен бірге олар Астананың тәжірибесін қарастыруға дайын. Вице-премьер әкімдердің орынбасарларына «Joltap» жобасын іске асырудың тиісті жоспарын әзірлеуді тапсырды.