Ақтөбеде жиһаз жасатуға тапсырыс берген ондаған тұрғын алаяқтарға алданып қалды, деп хабарлайды kazlenta.kz тілшісі Polisia.kz сайтына сілтеме жасап.
Ақтөбе қаласында тапсырыспен жиһаз жасау сылтауымен алаяқтық жасау деректері жиілеп кетті. Алаяқтар жиһаз дайындау қызметін ұсынатын хабарландырулар жариялап, азаматтардан тапсырыс қабылдайды және алдын ала төлем алады. Алайда ақшаны алғаннан кейін өз міндеттемелерін орындамай, тапсырыс берушілерді алдап соғады. Салдарынан тұрғындар тапсырыс берген жиһаздарын ала алмай, ақшаларынан айырылуда.
Қазіргі уақытта осы деректер бойынша екі күдіктіге қатысты сотқа дейінгі тергеп-тексеру амалдары жүргізілуде. Қажетті тергеу әрекеттері атқарылып жатыр. Жақын арада қылмыстық істер бойынша жинақталған материалдарды сотқа жолдау жоспарлануда. Айта кетейік, қылмыстық істердің бірінде ондаған азамат жәбірленуші деп танылған.