Астанада жасанды интеллект пен робототехникаға арналған «AI ROBOTICS | FIRST CAMP» республикалық форумы өтті. Іс-шара «AMANAT» партиясы Астана қалалық филиалы, Астана қаласы әкімдігінің Әдістемелік орталығы және №115 мектептің бірлескен ұйымдастыруымен өтті, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Форумның негізгі мақсаты – жасанды интеллект пен робототехнологияларды білім беру жүйесіне енгізу, FIRST Robotics халықаралық қозғалысын дамыту, сондай-ақ оқушылардың цифрлық және инженерлік құзыреттерін арттыру.
Форум бағдарламасы аясында жасанды интеллект пен робототехника саласындағы өзекті мәселелер талқыланған панельдік сессиялар өтті, сала сарапшылары баяндама жасап, тәжірибе алмасты. Сонымен қатар робототехника бойынша жарыстар ұйымдастырылып, қатысушылар өз жобаларын таныстырды.
Іс-шараға білім беру ұйымдарының өкілдері, педагогтер, IT және инженерлік сала мамандары, оқушылар мен осы бағытқа қызығушылық танытқандар қатысты. Форум білім мен технологияны тоғыстырған тиімді диалог алаңына айналды.«Жасанды интеллект пен робототехника – қазіргі заманның басты бағыттарының бірі. «AI ROBOTICS | FIRST CAMP» форумы оқушылардың технологиялық ойлауын дамытып, оларды болашақ мамандықтарға бейімдеуге мүмкіндік берді. «AMANAT» партиясы білім беру саласындағы осындай инновациялық бастамаларды әрқашан қолдайды», – дейді «AMANAT» партиясы Астана қалалық филиалының атқарушы хатшысы Мұхаммед Болысбек.
