Жамбыл облысында полиция әлеуметтік желілердегі кальян жарнамасының жолын кесті, деп хабарлайды kazlenta.kz тілшісі Polisia.kz сайтына сілтеме жасап.
Жамбыл облысының полиция департаменті қызметкерлері интернет кеңістігіне тұрақты түрде мониторинг жүргізеді. Полицейлердің назарына кальян өнімдері мен келушілерге оны шегу қызметін ұсынатын орындарды жарнамалайтын жарияланымдар ілікті. Заң талаптарын бұза отырып жарнама орналастырған нысандар анықталғаннан кейін, полицейлер сол орындарда тексеру жұмыстарын жүргізді.
Нәтижесінде Тараз қаласындағы 7 кафе мен барда заң бұзушылықтар анықталып, мекеме әкімшілері әкімшілік жауапкершілікке тартылды. Бұл бағыттағы жұмыс жүйелі түрде жүргізілуде. Мекеменің танымалдығы мен әлеуметтік желідегі жазылушылар саны оның иелері мен әкімшілерін заң талаптарын орындау міндетінен босатпайды. Полиция әлеуметтік желілерге мониторинг жүргізуді жалғастырып, анықталған әрбір заң бұзушылық дерегі бойынша тиісті шаралар қабылдайды.