Қызылорда облысында 9 жастағы баланың Toyota Sienna автокөлігін басқарып жүргені анықталды. Оқиға Арал ауданында күндізгі уақытта болған, деп хабарлайды kazlenta.kz тілшісі Polisia.kz сайтына сілтеме жасап.
Полиция әлеуметтік желілерге мониторинг жүргізу барысында баланың көлік тізгінінде отырғаны бейнеленген видеоны анықтаған. Тексеру кезінде автокөліктің баланың әкесіне тиесілі екені белгілі болды. Кәмелетке толмаған баланы тәрбиелеу және оның қауіпсіздігін қамтамасыз ету жөніндегі міндеттерін тиісінше орындамағаны үшін заңды өкілі әкімшілік жауапкершілікке тартылды.
Сот шешімімен ата-анасына айыппұл салынды. Сонымен қатар полиция қызметкерлері баламен және оның ата-анасымен профилактикалық әңгіме жүргізді. Полиция ата-аналарды балалардың қауіпсіздігіне жауапкершілікпен қарауға шақырды. Тәртіп сақшылары автокөлік кілттерін балалардың қолы жетпейтін жерде сақтап, кәмелетке толмағандардың көлік басқаруына жол бермеу қажеттігін ескертті.