Астана қаласының Сарыарқа ауданындағы Төтенше жағдайлар басқармасының қызметкерлері өрт қаупінің алдын алу мақсатында жеке тұрғын үй секторында профилактикалық рейд өткізді, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Астана қаласы ТЖД Мемлекеттік өрт бақылау басқармасы бастығының орынбасары, подполковник Ғабит Бабаевтың айтуынша, іс-шараның басты мақсаты – тұрғын үйлердегі өрт пен көмірқышқыл газынан улану қаупін азайту.«Өрттердің басым бөлігі жеке тұрғын үйлерде тіркеледі. Ең қауіпті кезең – жылыту маусымы. Біз рейдтік іс-шараларды тұрақты түрде өткізіп, қала тұрғындарына өрт қауіпсіздігі талаптарын түсіндіреміз. Әлеуметтік жағынан осал отбасылардың үйлеріне көмірқышқыл газын анықтайтын датчиктер орнатылады. Бүгін екі құрылғы қойылды», – деді ол.
Құтқарушылар сондай-ақ пеш жағу кезінде сақталуы тиіс қауіпсіздік ережелерін еске салды. Пештің жарамдылығын алдын ала тексеру қажет. Пештің кірпіші жарылып, саңылау болмауы, ал мұржада тарту күші жақсы болуы тиіс. Сонымен қатар түтін шығатын жол қабырғалар мен қабатаралық жабындардың тұтану қаупін болдырмайтындай етіп жасалуы қажет.
Пештің қатты қызып кетуінің алдын алу үшін оны күніне бірнеше рет жаққан жөн. От жағар кезде жанғыш сұйықтықтарды қолдану қауіпті. Жанып тұрған пешті қараусыз қалдыруға болмайды, пешті тек ересек адамдар ғана жағу қажет.