2025 жылдың басынан бері Алматыда 19,5 мыңнан астам жас жұмыспен қамтылды. Бұл жастардың дамуы мен өзін-өзі жүзеге асыруына тең мүмкіндік жасауға бағытталған жүйелі жұмыстың нәтижесі, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Jasalmaty.kz онлайн-платформасы, сондай-ақ Jobfair365 және SkillBridge сервистері арқылы 25 мыңнан астам қолданушы тартылды. Қазақстанның 20 өңірінен 3 мыңнан астам жұмыс беруші тіркеліп, 5 мыңнан астам бос жұмыс орны жарияланды. Аталған сервистер арқылы 1,8 мың жас тұрақты жұмысқа орналасты.Алматыда NEET санатындағы жастардың үлесі 6,4%-дан 5,8%-ға дейін азайып, жастар арасындағы жұмыссыздық деңгейі 4,4%-дан 4,1%-ға төмендеді.
Қалада Жастар мансап орталығы жұмыс істейді. Ол жұмыс берушілерді, оқу орындарын және жұмыспен қамту қызметтерін бір алаңға біріктіріп, өзара іс-қимылды үйлестіруге мүмкіндік береді. Орталық іске қосылғалы бері 5 мыңнан астам адам жүгініп, 4 мыңы жұмысқа орналасуға көмек алған.
Жыл ішінде 8 Мансап күні өткізілді. «Жасыл ел» бағдарламасы аясында жаз мезгілінде 2,1 мың жас уақытша жұмыспен қамтылды. Еңбек мобильділігі орталығы арқылы 9,7 мың адам жұмысқа орналастырылды.