Алматыда жастар үшін маңызды алаңға айналған комьюнити орталықтары қарқынды дамып келеді. 2024 жылы қала әкімі Ерболат Досаевтың бастамасымен сегіз жаңа орталық ашылды, биыл олардың саны 16-ға жетпек, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Бұл көпфункционалды ұйымдар психологиялық және заңгерлік көмек, жұмыспен қамту және қаржылық сауат бойынша кеңестер, сондай-ақ тіл курстарын ұсынады. Қатысушылар орталықтардың жұмыс табуға ғана емес, идеясы мен стартапын жүзеге асыруға да септігін тигізетінін айтады. 2024 жылы 1,7 мыңнан астам іс-шара өтіп, 380 мыңнан астам жас қамтылды. Орталықтар белсенді жастардың басын қосып, қатысушылар мен қалалық әлеуметтік бастамалардың дамуына ықпал етеді.