Алматы әкімі Дархан Сатыбалды Түрксіб ауданына жұмыс сапарымен барып, Сейфуллин даңғылынан Шолохов көшесіне дейінгі ұзындығы 3,3 км болатын Ақан Сері көшесіндегі орташа жөндеу жұмыстарының барысын тексерді, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Аталған аумақта жол жабыны жаңартылып, заманауи «қалқымалы» кәріз қақпақтары орнатылып, техникалық тротуарлар салынып жатыр. Сонымен қатар, жүргіншілерге қолайлы инфрақұрылым мен қоғамдық көлік аялдамаларын көркейтуге ерекше мән беріліп отыр. Жоспар бойынша жұмыс осы айдың соңына дейін аяқталмақ.
Жалпы, биыл қала бойынша ұзындығы 270 км болатын 360 көше, оның ішінде 19 магистральдық жол орташа жөндеуден өтеді.
Сондай-ақ, шаһар басшысы бизнестің әлеуметтік жауапкершілігі аясында жаңартылған Сәкен Сейфуллин атындағы саябақты көркейту жұмыстарымен танысты. Мұнда жүргіншілер аймақтары жаңартылып, спорт және балалар ойын алаңдары қайта жабдықталған, гүлзарлар отырғызылған. Жұмыс сапары барысында тұрғындар ауланың жай-күйі, инженерлік инфрақұрылымды жаңғырту мен қоғамдық көлік қызметінің сапасын арттыру жайын көтерді. Барлық ұсыныс-пікір жан-жақты қарастыру және тиісті шешім қабылдау үшін жауапты мекемелерге жолданды.