Алматы әкімі өзен арналарының нығайтылу жобаларын іске асыру кезінде мерзім мен сапаның сақталуын қамтамасыз етуді тапсырды, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Дархан Сатыбалды Алматының үш ауданындағы өзен арналарының жаңғырту жұмыстарын тексерді.
Алматы әкімі Дархан Сатыбалды Бостандық, Наурызбай және Әуезов аудандарында жүргізіліп жатқан өзен арналары мен каналдарды қайта жаңғырту және жағалауды бекіту жобаларымен танысты. Жұмыс барысы, аяқталу мерзімдері, техникалық сипаттамалар және кестенің орындалуы мәселелері қаралды.
Әкімнің жұмыс сапарының алғашқы нысаны Тұңғыш Президент саябағынан Қарғалы өзеніне дейін созылып жатқан М-1 каналы болды. Мұнда ұзындығы 3,8 км болатын аумақта жұмыс жүріп жатыр. Жобаға сәйкес, еңістері бетон және габиондармен нығайтылады, өткелдер салынып, қолданыстағы гидротехникалық құрылыстар ауыстырылады, сонымен қатар аумақ абаттандырылып, шағын сәулет пішіндер, балалар және спорт алаңдары орнатылып, жарық тартылды.
Наурызбай ауданында әкім Сапожников өзенінің арнасын бекіту жұмыстарының барысымен танысты. Жоба ұзындығы 1,8 км болатын Жандосов көшесінен Ақсай өзеніне дейінгі учаскені қамтиды. Жұмыстарға инженерлік зерттеулер, су қорғау жолағын абаттандыру, көгалдандыру, жарықтандыру, пирстер мен спорт алаңдарын орнату кіреді.
Келесі нысан Әуезов ауданында Қарғалы өзенінің арнасын Жандосов көшесінен Рысқұлов даңғылына дейінгі бөлігінде реконструкциялау болды. Жұмыс ұзындығы 6,7 км. Жоба жағалауды бекіту, бұзылған учаскелерді қалпына келтіру, жаяу жүргіншілер көпірлерін салу, абаттандыру және су өткізу қабілетін қамтамасыз етуді көздейді.
Жұмыс сапарының қорытындысы бойынша Дархан Сатыбалды аудан әкімдіктеріне және салалық басқармаларға жобаларды жүзеге асыру мерзімі мен сапасын қатаң бақылауды қамтамасыз етуді тапсырды.