Алматы қаласының әкімі Дархан Сатыбалды әл-Фараби даңғылынан Төле би көшесіне дейінгі аралықтағы Розыбакиев көшесін қайта жаңғырту жобасымен танысты, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Жұмыстар қалалық көшелерді көріктендірудің бірыңғай стандарты аясында жүргізіледі. Жоба тұрғындар үшін жайлы әрі қауіпсіз орта қалыптастыруға бағытталған. Оның аясында тротуарларды кеңейту, велоинфрақұрылымды дамыту, заманауи жарықтандыру жүйесі мен көше жиһаздарын орнату көзделген. Сондай-ақ, көгалдандыру жайына ерекше назар аударылады. Қайта жаңғырту барысында тамшылатып суару жүйесі енгізіледі. Бұл суарудың тиімділігін арттырып, суды ұтымды пайдалануға мүмкіндік береді.
