Павлодар облысында полиция қолайсыз ауа райы кезінде 2600-ден астам автокөлікке жол көрсетті, – деп хабарлайды kazlenta.kz тілшісі Polisia.kz сайтына сілтеме жасап.
Соңғы тәулікте Павлодар облысының автожолдарында ауа райының күрт нашарлауына және көру мүмкіндігінің нөлге дейін төмендеуіне байланысты бірқатар шектеулер енгізіліп, жекелеген учаскелерде барлық көлік түрлерінің қозғалысы уақытша тоқтатылды.
Ауа райы және жол жағдайының нашарлау кезеңінде жедел өзара іс-қимылды қамтамасыз ету мақсатында Павлодар облысымен шектесетін өңірлерде автожолдарды бір мезгілде жабу туралы шешім қабылданды. Қабылданған шаралардың нәтижесінде көптеген жүргізушілер қиын учаскелерден қауіпсіз өтіп, аман-есен жетті.
Жедел арнаға патрульдік полиция қызметкерлерінің кәсібилігі мен дер кезінде көрсеткен көмегі үшін алғыс білдірген 30-ға жуық қоңырау түсті. Полиция жүргізушілерді көлік құралдарын қысқы кезеңге алдын ала дайындауға шақырады: шиналардың жай-күйін, тежеу жүйесін, техникалық сұйықтықтардың деңгейін және қажетті қысқы жабдықтардың болуын тексеру қажет. Әсіресе жолаушылар тасымалдайтын көлік жүргізушілеріне және қалааралық трассаларға шығатын азаматтарға ерекше назар аудару сұралады. Жылдамдық режимін, арақашықтықты және маневр жасау қағидаларын қатаң сақтау, ауа райындағы өзгерістер туралы ақпаратты қадағалау және жолдар жабылған жағдайда сапарға шықпау қажет. Ауылдық елді мекен тұрғындарына қолайсыз ауа райы кезінде алыс қашықтыққа жаяу жүріп өтуден бас тарту ұсынылады.