Маңғыстау облысында хабар-ошарсыз кеткен азаматтарды іздестіру бағытында жұмыстар жалғасуда, деп хабарлайды kazlenta.kz тілшісі Polisia.kz сайтына сілтеме жасап.
Маңғыстау облысында 2026 жылдың 10 айында хабар-ошарсыз кеткен азаматтарды іздестіру бағытында бірқатар жұмыс атқарылды. Есепті кезеңде кәмелетке толмаған балалардың жоғалуына қатысты 20 өтініш тіркеліп, олардың барлығы дер кезінде табылып, аман-есен отбасыларына қайтарылды. Сонымен қатар ересек азаматтардың жоғалуына байланысты полицияға 147 өтініш түскен. Оның ішінде ұзақ уақыт хабарсыз кеткендерге қатысты 30 іздестіру ісі қозғалып, 28 адамның жүрген жері анықталды. Адам өмірі мен қауіпсіздігі – полиция қызметіндегі басты басымдық. Хабар-ошарсыз кеткен азамат туралы ақпарат түскен сәттен бастап полицейлер уақыт жоғалтпай іздестіру жұмыстарына кіріседі.
Іздестіру барысында заманауи технологиялар, соның ішінде дрондар қолданылып, түрлі қызмет бөлімшелерінің қызметкерлері жұмылдырылады. Ауа райының қолайсыздығы мен аумақтың күрделілігіне қарамастан, іздеу жұмыстары үздіксіз жүргізіледі. Полиция үшін ең бастысы – жоғалған азаматты аман-есен тауып, жақындарына қайтару. Адамдардың жоғалуына көбіне отбасылық жанжалдар, жақындарымен түсініспеушілік және басқа да өмірлік жағдайлар себеп болады. Полиция азаматтарды жақындары хабар-ошарсыз кеткен жағдайда уақыт оздырмай полицияға хабарлауға шақырады.