Өскеменде жыл басынан бері ойын-сауық орындарынан полицияға түскен шақыртуларға талдау жүргізілді, деп хабарлайды kazlenta.kz тілшісі Polisia.kz сайтына сілтеме жасап.
Осы жылдың 10 айында қаладағы кафе, бар, түнгі клуб және өзге де ойын-сауық орындарынан "102" арнасына 1080 қоңырау тіркелген. Талдау нәтижесінде полицияға ең көп хабарлама түскен бес ойын-сауық орны анықталды. Атап айтқанда, олардың бірінен 50, екіншісінен 45, ал қалған үшеуінен тиісінше 36, 33 және 32 қоңырау түскен. Айта кетейік, өткен жылдың сәйкес кезеңімен салыстырғанда мұндай хабарламалар саны 1,5 есе азайған.
Полицияға түскен әрбір қоңырау міндетті түрде құқық бұзушылық жасалғанын білдірмейді. Хабарламалар түрлі жағдайларға байланысты түседі және олардың әрқайсысы жеке тексеруді қажет етеді. Полиция ойын-сауық орындарындағы қоғамдық тәртіп пен азаматтардың қауіпсіздігін қамтамасыз етуге ерекше назар аударады. Бұл ретте мекеме әкімшілігі келушілердің қауіпсіздігіне мән беріп, жанжалдардың алдын алу шараларын қабылдауы маңызды. Тәртіп сақшылары тұрғындарға демалыс кезінде қоғамдық тәртіпті сақтап, өзара сыйластық таныту қажеттігін ескертеді.