Алматыда әлеуметтік осал санаттағы тұрғындарды жүйелі қолдау жалғасып келеді. 2025 жылы жеті негізгі жоба аясында 8,2 мыңнан астам адам қамтылып, оларға кешенді көмек көрсетіліп, қоғамға бейімделуіне жағдай жасалды. Бұл туралы қалалық Жұмыспен қамту және әлеуметтік бағдарламалар басқармасының өкілдері айтты, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Атап айтқанда, «Тәуелсіз өмір мектебі», «Жарқын өмір», «Жаңа өмір», «Isker Isi», Әлеуметтік интеграция орталығы, «Иппотерапия» және Мүгедектер арбасын жөндеу орталығы жобалары жүзеге асырылып жатыр. Айта кету керек, Алматы халқының 16,3%-ы (шамамен 375,8 мың адам) әлеуметтік осал санатқа жатады. Олардың қатарында зейнеткерлер, мүгедектігі бар адамдар, көпбалалы отбасылар, жетім балалар, ардагерлер, тыл еңбеккерлері және басқа да санаттар бар.