Алматыда әл-Фараби даңғылының солтүстік жағында Есентай өзеніндегі вело жүргіншілер көпірінің құрылысы жалғасып келеді. Ал даңғылдың оңтүстік бетінде орналасқан жүргіншілер көпірінің құрылысы іс жүзінде аяқталуға жақын, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Жобаға іргелес аумақты кешенді көріктендіру енгізілген: жол бойына шамамен 50 бұта егіліп, қала тұрғындарының демалуына арналған жасыл аймақ жасақталады. Биыл көктемде кесілген ағаштың орнына қала бойынша қосымша тағы 580 ағаш егу жоспарланған.
Қоғам белсенділерінің айтуынша, жоба тұрғындардың ұсынысы ескеріліп пысықталған: көпірлер автожол құрылысына жақындатылып, инженерлік желілердің орны ауыстырылған. Бұл жоспарлау шешімдерін оңтайландыруға мүмкіндік берген.Құрылысты биыл тамыз айында аяқтау жоспарланып отыр. Көріктендіру бойынша ескерту болған жағдайда мердігер ұйым оларды толық көлемде жоюға міндетті.