Алматы әкімі Дархан Сатыбалды жұмыс сапары барысында CHAMP1ON спорт кешенін және Қазақстан Республикасының Ұлттық кітапханасын аралап көрді, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
CHAMP1ON спорт кешені жүзу, баскетбол, фитнес және триатлонмен айналысуға барлық жағдай жасалған заманауи орталық. Мұнда 50-ден астам кәсіби спортшыдан тұратын құрама командалар дайындалады. Соңғы жылдары орталық спортшылары қалалық, республикалық және халықаралық жарыстарда 90-нан астам медаль иеленіп, 10 үміткер спорт шебері дәрежесіне жетті. Ал 3 спортшы Қазақстанның триатлон бойынша ұлттық құрамасына енді.
Кешен базасында MY WIN атты қайырымдылық жобасы жүзеге асырылып жатыр. Жоба аясында 3 мыңнан астам бала мен жасөспірім спортпен шұғылданып, қабілетін дамыта алды.
Ұлттық кітапхана еліміздің ең ірі мәдени әрі ғылыми орталығы, тарихы 1910 жылдан бастау алады. Мұнда ұлттық кітап қоры сақталып, заманауи цифрлық сервистер енгізіліп, қала тұрғындарының білім алып, мәдениетін дамытуға жағдай жасалып отыр.
«Қаланың әр ауданында, әсіресе жастар үшін заманауи әрі қолжетімді спорттық және мәдени кеңістіктердің болуы маңызды. Спорт инфрақұрылымын дамыту мен Ұлттық кітапхана сияқты мәдени мекемелерді қолдау - белсенді, білімді және мықты ұрпақ қалыптастырудың негізі», — деді Дархан Сатыбалды.
Қала басшысы тиісті басқармаларға спорттық, мәдени және демалыс орындарын одан әрі дамытып, алматылықтардың өзін-өзі дамытуы мен белсенді өмір салтына қолайлы жағдай жасау жөнінде тапсырма берді.
