Әкімдікте Алматы әкімі Дархан Сатыбалды мен Шанхай қаласы әкімінің орынбасары, қоғамдық қауіпсіздік басқармасының басшысы Чжан Я Хун арасында ресми кездесу өтті, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Келіссөз барысында тараптар экономика, инвестиция, туризм, цифрлық технологиялар және қоғамдық қауіпсіздік салаларындағы ынтымақтастықты кеңейту мәселелерін талқылады.
Дархан Сатыбалды Қытай Алматының негізгі сауда-экономикалық серіктестерінің бірі екенін атап өтті. Бүгінде қалада қытай капиталы бар 2,9 мыңнан астам кәсіпорын жұмыс істейді. Қытаймен тауар айналымы мегаполистің сыртқы саудасының үштен біріне тең. 2025 жылдың қаңтар–шілде айларында өзара сауда көлемі 5 млрд АҚШ долларына жетіп, өткен жылмен салыстырғанда 17%-ға өсті.
Әсіресе, қауіпсіздік саласындағы тәжірибе алмасу мәселесіне ерекше көңіл бөлінді. Әкім Алматының қоғамдық қауіпсіздікті арттыру үшін Шанхайдың заманауи технологиялар мен жасанды интеллектті қолданудағы тәжірибесіне қызығушылық танытты.
«Шанхай – әлемдегі ең қауіпсіз қалалардың бірі. Біз цифрлық шешімдерді енгізу және инновацияларды пайдалану бойынша тәжірибе алмасуға мүдделіміз», – деді Дархан Сатыбалды.
Кездесуде туризм мен Алматының тау кластерін дамыту, мәдени байланыстар және креативті индустриядағы бірлескен бастамалар да сөз болды. Атап айтқанда, Алматы–Шанхай, Алматы–Гуанчжоу және Алматы–Инин бағыттарында ашылған тікелей әуе рейстерінің маңызы айтылды. Сондай-ақ, венчурлық қорлар мен компанияларды ортақ жобаларға тарту мүмкіндігі талқыланды.
Өз кезегінде Чжан Я Хун екіжақты байланыстарды нығайтуға дайын екенін жеткізіп, сауда-экономикалық, мәдени және гуманитарлық саладағы серіктестіктің жоғары әлеуетін атап өтті.
Кездесу қорытындысында тараптар ынтымақтастықты жалғастырып, Алматы делегациясының қараша айында Шанхайға ресми сапарын өткізуге уағдаласты.