Алматы әкімі Дархан Сатыбалды Қазақстандағы Франция Республикасының Елшісі Сильван Гиогемен ынтымақтастық мәселесін талқылады, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Кездесу барысында экономиканы дамыту, мәдени байланыстарды кеңейту, көлік инфрақұрылымы мен қаланы жаңғырту жайы қаралды. Дархан Сатыбалды Алматы француз инвестициясына ашық екенін атап өтті: бүгінде қалада француз капиталының қатысуымен шамамен 60 кәсіпорын жұмыс істейді, ал 2005 жылдан бері тартылған инвестиция көлемі 20 млрд АҚШ долларынан асты. Қалада серіктестік үшін барлық жағдай жасалған – арнайы экономикалық аймақтар, дамыған инфрақұрылым және белсенді іскерлік орта бар.
Франция елшісі білім, мәдениет және экономика салаларындағы бірлескен жобаларды кеңейтуге мүдделі екенін білдіріп, екіжақты қарым-қатынастарды нығайтудың маңыздылығын атап өтті.
