Қазақстан Республикасы Көлік вице-министрі Жәнібек Тайжанов Қостанай облысының тұрғындарымен кездесу өткізіп, онда өңірдің көлік инфрақұрылымын дамытуға қатысты өзекті мәселелер талқыланды, деп хабарлайды kazlenta.kz тілшісі ҚР Көлік министрілігіне сілтеме жасап.
Кездесу барысында «Орталық – Батыс» стратегиялық жобасын іске асыру, автомобиль жолдарының сапасы мен қауіпсіздігі, ауыр жүк көліктерінің қозғалысын бақылау және белгіленген салмақтық шектеулердің сақталуы мәселелері қаралды. Сондай-ақ жолдарды салу және күтіп-ұстау жұмыстарына жергілікті мердігерлерді тарту мәселесі көтерілді.
Бұдан бөлек, өткізу пункттерінің жұмысына қатысты мәселелер, оның ішінде «Қайрақ» өткізу пунктінде кезектің қалыптасуы, сондай-ақ оларды жаңғырту және өткізу қабілетін арттыру перспективалары талқыланды.
Авиация саласында тұрғындар Қостанай – Ақтау бағыты бойынша тікелей әуе қатынасын ашу мүмкіндігін қарастыруды және Қостанай – Арқалық рейстерінің кестесін қайта қарауды ұсынды. Теміржол көлігі саласында жолаушылар вагондарын жаңарту, вокзалдар мен станцияларды жаңғырту мәселелері талқыланды.
Көтерілген барлық мәселелер бойынша түсіндірмелер беріліп, көлік саласындағы жоспарлар туралы мәлімет берілді.
Кездесу қорытындысы бойынша тұрғындардың барлық ұсыныстары мен өтініштері хаттамаға енгізілді. Вице-министр жауапты құрылымдарға көтерілген мәселелерді пысықтауды және олардың орындалуын ерекше бақылауға алуды тапсырды.