Қазақстан Республикасы Көлік вице-министрі Жәнібек Тайжанов бастаған Қазақстандық делегация көлік, логистика және транзит салаларындағы екіжақты ынтымақтастықты дамыту мақсатында Ресей Федерациясының Орынбор қаласына жұмыс сапарымен барды. Сапар аясында Орынбор облысының губернаторы Евгений Солнцевпен кездесу өтті, деп хабарлайды kazlenta.kz тілшісі ҚР Көлік министрлігіне сілтеме жасап.
Кездесу барысында тараптар көлік-логистика саласындағы өзара іс-қимылдың қазіргі жағдайы мен даму перспективаларын талқылады. Теміржол инфрақұрылымын дамыту, мемлекетаралық түйісу пункттерінің өткізу қабілетін арттыру және жүк тасымалы көлемін ұлғайту мәселелеріне ерекше назар аударылды.
Сондай-ақ, Илецк теміржол өткізу пунктінің жұмыс істеуі мен оны жаңғырту мәселелері жеке қарастырылды. Қазақстандық делегация нысанның қазіргі операциялық қызметімен танысып, ресейлік әріптестермен оның өткізу қабілетін арттыру шараларын, соның ішінде тексерудің параллель рәсімдерін енгізу және инфрақұрылымды дамытуды үйлестіру мәселелерін талқылады.
Бұдан бөлек, Орынбор облысының Сауда-өнеркәсіп палатасының өкілдерімен, ірі өнеркәсіптік экспорттаушы кәсіпорындармен және астық секторы компанияларымен кездесу өтті. Келіссөздер барысында сауда-экономикалық ынтымақтастықты кеңейту, өңірдің экспорттық әлеуетін дамыту және Қазақстан аумағы арқылы өнім тасымалы көлемін арттыру мәселелері қарастырылды.
Тараптар Қазақстан мен Орынбор облысы арасындағы тасымалдардың тұрақты оң динамикасын, сондай-ақ транзиттік ағындардың айтарлықтай өскенін атап өтті.
Сапар қорытындысы бойынша шекаралық инфрақұрылымның өткізу қабілетін кеңейту және халықаралық көлік дәліздерін дамыту бағытында бірлескен жұмысты жалғастыру туралы келісімге қол жеткізілді