Ақтөбе облысының полиция департаментінің қызметкерлері Отан қорғаушылар күнін салтанатты түрде атап өтті, – деп хабарлайды kazlenta.kz тілшісі Polisia.kz сайтына сілтеме жасап.
Мемлекеттік мереке — Отан қорғаушылар күніне орай Ақтөбе облысының полиция департаментінде салтанатты іс-шара өтті. Ресми бөлім басталар алдында департамент бастығы, Абай Жусупов ерекше көзге түскен қызметкерлерге Қазақстан Республикасы Ішкі істер министрлігінің ведомстволық наградаларын және департаменттің алғыс хаттары мен грамоталарын салтанатты түрде табыс етті.
Ішкі істер министрінің бұйрығымен Ақтөбе қаласы полиция басқармасының бастығы Әсет Қалиевке және есірткі қылмысына қарсы іс-қимыл басқармасының бастығы Берік Айсинге мерзімінен бұрын полиция полковнигі арнаулы атағы берілді. Сондай-ақ екі қызметкерге полиция подполковнигі арнаулы атағы мерзімінен бұрын табысталды.
Салтанатты шара аясында "Ішкі істер органдарының үздігі" I дәрежелі төсбелгісі 5 қызметкерге, "Құқық тәртібін қамтамасыз етуге қосқан үлесі үшін" төсбелгісі 5 қызметкерге; ІІМ грамоталары 4 қызметкерге, ІІМ-нің алғыс хаттары 4 қызметкерге берілді. Ақтөбе облысы ПД бастығының бұйрығымен 8 қызметкерге грамоталар мен алғыс хаттар табысталды, ал ішкі істер органдарының бес ардагеріне қызметкерлердің жас ұрпағын тәрбиелеуге қосқан үлесі үшін алғыс хаттар табыс етілді. Сондай-ақ жас полиция қызметкерлерінің ата-аналары да назардан тыс қалмады. 5 ата-анаға құқық қорғаушыларды тәрбиелеуге қосқан үлесі үшін алғыс хаттар берілді. Жиын барысында Абай Жусупов жеке құрамды, ардагерлерді және шақырылған қонақтарды Отан қорғаушылар күнімен құттықтап, олардың ел қауіпсіздігін қамтамасыз ету жолындағы адал еңбегіне алғысын білдірді. Одан әрі іс-шара полиция қызметкерлері мен "Жас сақшы" сыныбының кадеттері дайындаған концерттік бағдарламамен жалғасты.