Ақтөбеде алаяқтарға алданған тұрғындар 3 миллион теңгеден астам қаражатынан айырылды, деп хабарлайды kazlenta.kz тілшісі Polisia.kz сайтына сілтеме жасап.
Ақтөбе облысында әлеуметтік желілер арқылы оңай табыс табуға уәде берген алаяқтардың әрекетінен бірнеше тұрғын зардап шекті. Олар алтын бұйымдарды қайта сату бизнесіне инвестиция салуды ұсынып, салған қаражатты екі еселеуге уәде берген. Полицияның тұрақты ескертулеріне қарамастан, тұрғындар интернет-алаяқтардың арбауына түсіп, жинаған ақшасынан айырылуда. Қаскөйлер әлеуметтік желілерде жалған жарнамалар жариялап, жоғары табысқа кенелгісі келетін азаматтардың сеніміне кіреді.
Мәселен, 33 жастағы Ақтөбе қаласының тұрғыны алаяқтардың шотына 1,5 миллион теңге аударған. Ал тағы бір қала тұрғыны "алтын" дивидендтер туралы уәдеге сеніп, 1 миллион 650 мың теңгесінен айырылған. Ақшаны алғаннан кейін алаяқтар байланысқа шығуды тоқтатып, әлеуметтік желілердегі парақшаларын жойған. Қазіргі уақытта аталған фактілер бойынша "Алаяқтық" бабы аясында тергеу амалдары жүргізіліп жатыр.