Шымкент қаласында мүгедектігі бар азаматтарды қолдау, олардың денсаулығын қалпына келтіру және қоғамға бейімделуіне жағдай жасау бағытындағы жұмыстар жаңа кезеңге өтті. Бозарық шағынауданында 150 орындық заманауи оңалту орталығы ашылып, әлеуметтік қызметтердің қолжетімділігін арттыруға бағытталған маңызды жоба жүзеге асты. Бұл нысан қаланың әлеуметтік инфрақұрылымын дамытуға арналған жүйелі шаралардың бір бөлігі саналады, деп хабарлайды kazlenta.kz.
Шымкент қаласының жұмыспен қамту және әлеуметтік қорғау басқармасының басшысы Жанат Өтебаева 2024–2026 жылдары атқарылған жұмыстар мен алдағы жоспарлар туралы баяндаған болатын. Оның мәліметінше, осы кезеңде әлеуметтік қызмет көрсету жүйесін кеңейту, жаңа нысандар салу және қолданыстағы орталықтардың материалдық-техникалық базасын нығайту бағытында бірқатар жоба қолға алынған.
Қаладағы әлеуметтік қызмет көрсету жүйесін дамыту аясында «№1 стационар жағдайдағы орталығына» қосымша 50 орындық ғимараттың құрылысы аяқталып, оны қажетті жабдықтармен қамтамасыз ету жұмыстары жүргізілген. Сонымен қатар «Сенім» және «Балауса» орталықтары құрылып, 18 жасқа дейінгі және 18-35 жас аралығындағы ерекше жандарға күндізгі стационар жағдайында арнаулы әлеуметтік қызмет көрсету мүмкіндігі жасалды.
Әлеуметтік қолдаудың тағы бір маңызды бағыты – мүгедектігі бар азаматтарға арналған оңалту қызметтерін кеңейту. Осы мақсатта құны 14,052 млрд теңгені құрайтын 150 орындық оңалту орталығының құрылысы қолға алынып, жуырда пайдалануға берілді. Бүгінде орталықтың мүгедектігі бар ересектерге қызмет көрсетуі үшін арнаулы әлеуметтік қызмет көрсету жөнінде лицензиясы рәсімделу үстінде.
Бозарық шағынауданында орналасқан жаңа кешен 5,3 гектар аумақты алып жатыр. Медициналық, оңалту, спорттық, әлеуметтік және тұрғын инфрақұрылымды біріктірген кешен I және II топтағы мүгедектігі бар азаматтарға жартылай стационарлық форматта арнаулы әлеуметтік қызмет көрсетуге арналған.
Орталықтың басты ерекшелігі – қызмет алушыларға кешенді қолдау көрсетуге бағытталған инфрақұрылымның қалыптастырылуы. Оңалту корпусында физиотерапия, механотерапия, массаж, сумен емдеу қызметтерін көрсетуге арналған кабинеттермен қатар, логопедиялық және психологиялық көмек бөлмелері орналасқан. Бұл азаматтардың физикалық жағдайын жақсартумен бірге, психологиялық қолдау алуына да мүмкіндік береді.
Әлеуметтік және еңбекке бейімдеу жұмыстарына да басымдық берілген. Орталықта тігін, қыш және слесарлық шеберханалар, шығармашылық бөлмелері мен кітапхана қарастырылған. Мұндай кеңістіктер қызмет алушылардың жаңа дағдыларды меңгеруіне, өз мүмкіндіктерін дамытуына және қоғам өміріне белсенді араласуына жағдай жасауға бағытталған.
Дене белсенділігін қалпына келтіру үшін де тиісті мүмкіндіктер жасалған. Емдік-сауықтыру бассейні бір мезетте 46 адамға дейін, ал спорт залы 25 адамға дейін қабылдай алады. 150 орындық акт залында мүгедектігі бар адамдар пайдаланатын арбаларға арналған 40 орын бар. Орталық отандық және шетелдік өндірістің заманауи медициналық жабдықтарымен қамтамасыз етілген.
«Қолдау» балалар орталығын қажетті жабдықтармен қамтамасыз етуге «Қазақстан халқына» қоры тарапынан 574,9 млн теңге көлемінде қолдау көрсету жоспарланған. Сондай-ақ бұрын жалға алынған ғимаратта жұмыс істеген «Белсенді ұзақ өмір орталығы» жаңа ғимаратқа көшіріліп, нәтижесінде 109,6 млн теңге үнемделген. Ал «Бейімдеу орталығында» қосымша 100 орындық ғимарат салу үшін жобалау-сметалық құжаттама әзірленіп жатыр, -деді басқарма басшысы.
Шымкентте жаңа оңалту орталығының ашылуы әлеуметтік қолдау жүйесін дамытудағы маңызды қадам болғанымен, бұл бағыттағы жұмыстың нәтижесі тек нысандардың санымен өлшенбейді. Орталықтардың сапалы қызмет көрсетуі, қажетті мамандармен және жабдықтармен қамтамасыз етілуі, сондай-ақ азаматтардың қызметтерге кедергісіз қол жеткізуі де шешуші мәнге ие. Осы тұрғыдан алғанда, жаңа оңалту орталығы медициналық көмекті, әлеуметтік бейімдеуді және еңбек дағдыларын дамытуды бір кешенге біріктіруімен ерекшеленеді.
Алдағы кезеңде бұл бастамалардың тиімділігі азаматтардың оңалту қызметтерін қаншалықты қолжетімді пайдалана алатынына, көрсетілетін көмектің сапасына және әлеуметтік бейімделу нәтижелеріне байланысты болмақ. Сондықтан инфрақұрылымды дамыту жұмыстарын қызмет сапасын арттырумен ұштастыру – Шымкенттің әлеуметтік саясаты алдындағы маңызды міндеттердің бірі.