Тұрғындар мен қала қонақтарының қауіпсіздігін қамтамасыз ету мақсатында Астана қаласында 50 "SOS" батырмасы орнатылған және тәулік бойы жұмыс істейді, деп хабарлайды kazlenta.kz тілшісі Polisia.kz сайтына сілтеме жасап.
Аталған жедел шақыру пункттері азаматтар көп шоғырланатын орындарда, атап айтқанда теміржол вокзалдары, базарлар мен қалалық саябақтар аумағында орналасқан. Бұл инфрақұрылым төтенше жағдай туындаған сәтте полициядан жедел әрі ыңғайлы түрде көмек сұрауға мүмкіндік береді. "SOS" батырмасы арқылы түскен әрбір сигнал бірден полицияның жедел басқару орталығына жолданып, белгіленген тәртіпке сәйкес жедел өңделеді.
Оқиға орнына жақын маңдағы патрульдік полиция жасағы дереу жіберіледі. Жыл басынан бері "SOS" батырмасы арқылы 31 өтініш қабылданып, барлық жағдайда азаматтарға қажетті көмек көрсетілді. Солардың бірі, қала тұрғыны "SOS" батырмасы арқылы көмек сұраған. Оқиға орнына келген полиция қызметкерлері әйел адамның өтінішіне себеп болған жағдайды анықтады. Тексеру барысында оның күйеуінің мас күйде болғаны белгілі болды. Қоғамдық тәртіп пен отбасы мүшелерінің қауіпсіздігін қамтамасыз ету мақсатында азамат полиция қызметкерлерінің сүйемелдеуімен медициналық оңалту орталығына жеткізілді. Полиция тұрғындарды қауіп төнген немесе шұғыл көмек қажет болған жағдайда "SOS" батырмасын немесе "102" нөмірін пайдалануға шақырады.