Алматы әкімі Дархан Сатыбалды Розыбакиев және Жароков көшелерінде салынып жатқан заманауи қоғамдық кеңістіктердің құрылыс барысымен танысты, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Жұмыс сапары аясында жобалардың жүзеге асырылу барысы мен аумақтарды кешенді көріктендіру жайы қаралды. Құрылыс сапасына, белгіленген мерзімнің сақталуына және жұмыстың тиімді ұйымдастырылуына ерекше назар аударылды. Жоба аясында жүргінші бағытын жаңарту, демалыс аймағын, балалар және спорт алаңын салу, велосипед инфрақұрылымын дамыту, сондай-ақ жаңа көше және сәндік жарықтандыру жүйелерін орнату көзделген.
Сонымен қатар қала әкімі «Оңтүстік» және Ганди саябақтарындағы көріктендіру жұмыстарының барысын тексерді. Жұмыс сапарының соңында барлық жұмыстың сапалы орындалуын қамтамасыз ету, жобаларды жүзеге асыру кестесін сақтау және құрылыс кезінде тұрғындарға келетін қолайсыздықты барынша азайту жөнінде тапсырма берілді.
