«Қазақстан» қонақ үйі ғимаратын ауқымды қайта жаңғырту жұмыстары аяқталды. Қоғамдық аймақтар мен номерлік қор заманауи жайлылық пен сервис стандарттарына сай жаңартылды. Сонымен бірге қаланың символына айналған нысанның танымал сәулеттік келбеті сақталды. Іргелес аумақты көріктендіру 2026 жылға жоспарланып отыр, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Сондай-ақ Шоқан Уәлиханов атындағы сквердің қазіргі жай-күйі тексерілді. Қоғамдық кеңістіктерді дамытуда тұрғындар мен қала қонақтары үшін қолайлылық, қауіпсіздік және тартымдылық басты басымдық болып қала береді. Сонымен қатар тарихи контексті ескеру және сапалы күтімді қамтамасыз ету маңызды.
Жұмыс сапарының соңында Жамбыл көшесі мен Назарбаев даңғылындағы тұрғын үйлердің қасбеттерін қайта жаңғырту жұмыстарының барысы қаралды. Жұмыстарда құрылыстың сәулеттік келбетін сақтау талаптары қатаң сақтала отырып, табиғи және сәндік тастар қолданылуда.