Шығыс Қазақстан облысында ҚАЖД-ға қарасты №73 мекеменің қызметкерлері ШҚО полиция департаментінің есірткі қылмысына қарсы іс-қимыл басқармасының қызметкерлерімен бірлесіп, сотталған адамға тыйым салынған зат жеткізу әрекетінің жолын кесті, - деп хабарлайды kazlenta.kz тілшісі Polisia.kz сайтына сілтеме жасап.
"Қарасора-2026" және "Тосқауыл" жедел-профилактикалық іс-шаралары аясында азық-түлік сәлемдемесін тексеру кезінде қызметкерлердің назарына пластик шейкер іліккен. Оны мұқият тексеру барысында ішінен "Silica Gel" деген жазуы бар шағын пакет табылған. Әдетте мұндай пакеттер аяқ киім, сөмке және басқа да тауарлардың қаптамасына ылғалды сіңіру мақсатында салынады. Алайда бұл жолы оның ішінде ылғал сіңіргіш зат емес, жасыл түсті, өзіне тән иісі бар өсімдік тектес зат жасырылғаны анықталды. Осылайша тыйым салынған затты күдік туғызбай, мекеме аумағына өткізу әрекеті әшкереленді. Табылған зат сот-химиялық сараптамаға жолданды. Сараптама қорытындысына сәйкес, қолданыстағы заңнама талаптарына сай процессуалдық шешім қабылданады.
ҚАЖ мекемелерінде қауіпсіздік талаптарының сақталуы тұрақты бақылауда. Тыйым салынған заттарды ішке өткізудің кез келген әрекетіне заң аясында тиісті шаралар қабылданады.