Ақтөбе облысы бойынша қылмыстық-атқару жүйесі департаментінің №70 мекемесінде тергеу қамауында отырған азаматтардың біріне арналған азық-түлік сәлемдемесін тексеру барысында мекеменің режимдік аумағына тыйым салынған затты өткізу әрекетінің жолы кесілді, – деп хабарлайды kazlenta.kz тілшісі Polisia.kz сайтына сілтеме жасап.
Сәлемдемені тексеру кезінде жедел бөлім қызметкерлері режим және күзет бөлімі қызметкерлерімен бірлесіп, қос түбі бар пластик ыдыстың ішіне мұқият жасырылған iPhone 15 Pro Max телефонын анықтады. Тексеру және тыйым салынған затты анықтау процесі мекемедегі бейнебақылау камералары мен қызметкерлердің бейнетіркегіштері арқылы толық тіркелді.
Аталған дерек бойынша тыйым салынған затты өткізуге әрекет жасаған азаматқа қатысты тиісті шара көрілді. Ақтөбе облысы бойынша қылмыстық-атқару жүйесі департаменті ҚАЖ мекемелерінің аумағына тыйым салынған заттарды өткізу әрекеттері қолданыстағы заңнаманы бұзу екенін және Қазақстан Республикасының заңнамасына сәйкес жауапкершілікке әкеп соғатынын ескертеді.