Астанада Креативті индустрияларды дамыту қорының ұйымдастыруымен 208 балаға арналған тегін «Ұлттық қолөнер мектебі» ашылды, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Жоба ұлттық қолөнер дәстүрін сақтап, оны креативті индустриялармен ұштастыруға бағытталған. Мектепте республикалық іріктеуден өткен 10 үздік шебер-тәлімгер дәріс береді. Байқауға еліміздің түкпір-түкпірінен 331 қолөнерші, ал оқу бағдарламасына 450-ден астам өтінім түсті. Нәтижесінде 208 бала тегін білім алу мүмкіндігіне ие болды.
27 шілде мен 12 тамыз аралығында қатысушылар зергерлік өнер, киіз басу, керамика, сүйек ою, кілем тоқу, тері және ағаш өңдеу сияқты 10 бағыт бойынша тәжірибелік білім алады. Бұл бастама ұлттық мұраны сақтап қана қоймай, балалардың шығармашылық қабілетін дамытып, болашақ креативті мамандықтарға қызығушылығын арттыруға және дәстүрлі өнердің жаңа тынысын қалыптастыруға жол ашады.
