Орал қаласында ұстаздар күніне орай «Ұстаз деген ұлы сөз ұлағатты» атты мерекелік концерт оздырылды. Шара барысында өңірімізге еңбегі сіңген, білім саласында үздік деп танылған педагогтар марапатталып, концерттік бағдарлама барша ұстаздар назарына ұсынылды. Сәні мен салтанаты келіскен шарада оқушылар да, балаларды білім нәрімен сусындатып жүрген ұстаздар да өнер көрсетті, деп хабарлайды kazlenta.kz.
Шара басталмастан бұрын педагогика саласына еңбегі сіңген еңбек ардагерлері қызыл кілеммен жүріп өтіп, шара қонақтары атанды.
Ардагерлеріміз барша ұстаздар қауымын мерекелерімен құттықтап өтті. Шара ұстаз жұмысы жайындағы көңіл тебірентерлік видеороликпен және сахналық көрініспен басталды. Келесі кезекте қала әкімі Шыныбеков Абат Абайұлы алғашқы құттықтау сөз сөйлеп, жүрегі жұмсақ, абзал жандарды шын жүректен аталмыш мерейлі күнмен құттықтап өтті.
«Қадірменді ұстаздар, құрметті білім саласының ардагерлері, баршаңызды алтын күзбен бірге келген төл мерекелеріңіз – ұстаздар күнімен шын жүректен құттықтаймын! «Ұстаз – жас ұрпақтың сәулетшісі» деп Бауыржан атамыз айтқандай өмірдегі барша ғалымды да, ақынды да, кеншіні де, басшыны да, еңбекшіні де тәрбиелейтін, білім беріп өсіретін – өздеріңізсіздер. Қандай заман болмасын тұлға ретінде қалыптасып, алға қарай даму үшін білім керек. Осы орайда меетепке тарыдай болып кірген оқушылардың таудай болып шығуына күш салатын, лайықты азамат болуына үлесін қосатын ұстаздардың рөлін атап өтпеске болмайды. Сондықтан барша ұстаздардың еңбегі өлшеусіз деп білемін. Баршаңызды тағы да атаулы күнмен құттықтаймын» деп, ізгі лебізін білдірді.
Осы орайда Орал қаласы әкімдігінің ұйымдастыруымен жыл сайын өткізілетін қала мектептерінің мұғалімдері арасында – «Орал қаласының Құрметті педагогі» байқауының нәтижесінде үздік нәтиже көрсеткен қаламыздың алдыңғы қатарлы мұғалімдері 100 мың теңгелік сертификатпен және алғыс хатпен марапатталды. Сонымен қатар Әлия Молдағұлова атындағы №38 мектеп-лицейінің орыс тілі мен әдебиеті пәні мұғалімі Шуламбаева Гульнара Кихметовнаға білім беру жүйесін дамытуға қосқан үлесі үшін – «Орал қаласының Құрметті педагогі» жергілікті ерекшелік белгісі бар төсбелгі табысталды. Төсбелгімен бірге педагогқа 875 мың теңгелік сертификат берілді.
Келесі кезекте Батыс Қазақстан облысы білім беру басқармасының басшысы Айгүл Әділгерейқызы Мыңбаева ұстаздарды Білім және ғылым министрлігінің Құрмет грамотасы және Алғыс хатымен марапаттады. Келесі құттықтау сөз Батыс Қазақстан облыстық білім және ғылым қызметкерлері кәсіподағының бас маман-заңгері Курмангазиева Гүлжанат Есетқызына берілді. Гүлжанат Есетқызы Қазақстандық еңбегі сіңген педагогтарға салалық білім және ғылым қызметкерлерінің кәсіподағының тарапынан «Білім және ғылым қызметкерлерінің кәсіподағына сіңірген еңбегі үшін» белгісін табыстады. Келесі кезекте Республикалық «Үздік педагог» байқауының қалалық кезеңінің жүлдегерлері Батыс Қазақстан облысының білім және ғылым қызметкерлері кәсіподағының алғыс хатымен және бағалы сыйлығымен мараптталды.
Ұстаздарға деген шексіз алғыс пен шынайы ризашылыққа толы мереке әсерлі концерттік бағдарламамен қорытындыланды.