1 маусымнан бастап Батыс Қазақстан облысының аумағында есірткі құралдарының заңсыз айналымына байланысты қылмыстарды анықтауға және жолын кесуге бағытталған "Қарасора – 2026" жедел-профилактикалық іс-шарасы өткізіліп жатыр, – деп хабарлайды kazlenta.kz тілшісі Polisia.kz сайтына сілтеме жасап.
Іс-шара басталғалы бері БҚО ПД полиция қызметкерлері есірткіге қатысты 11 құқық бұзушылық анықтады, оның ішінде 6 қылмыс және 5 қылмыстық теріс қылық тіркелді. Заңсыз айналымнан 1 келіден астам мефедрон тәркіленді, бұл 3 мыңнан астам бір реттік дозаға тең. Атап айтқанда, есірткі қылмысына қарсы іс-қимыл басқармасының қызметкерлері Орал қаласындағы тұрғын үйлердің бірінің ауласында жергілікті тұрғынды ұстады. Оны тінту барысында шамамен 500 грамм синтетикалық есірткі табылып, тәркіленді. Кейін облыс орталығының тағы бір тұрғыны ұсталды.
Жедел-іздестіру іс-шараларын жүргізу барысында одан шамамен 600 грамм синтетикалық есірткі тәркіленді. Алдын ала мәліметтер бойынша ұсталғандар есірткі таратумен айналысқан интернет-дүкендердің бірі арқылы заңсыз қызмет жүргізген. Қазіргі уақытта сотқа дейінгі тергеп-тексеру амалдары жүргізілуде, құқық бұзушылықтардың барлық мән-жайы анықталады. Сонымен қатар 26 мамыр мен 26 маусым аралығында өтіп жатқан есірткіге қарсы айлық аясында 32 профилактикалық іс-шара ұйымдастырылып, өткізілді. Олардың қатарында дәрістер, халықпен кездесулер, рейдтік іс-шаралар және есірткіні қолдану мен таратудың зияны туралы теріс көзқарас қалыптастыруға бағытталған ақпараттық-түсіндіру акциялары бар.