Алматыда ауа сапасын бақылау жүйесін кеңейту жоспарлануда. Мәслихат отырысында қаланың әртүрлі ауданындағы атмосфералық ауаның жай-күйі туралы деректерді нақты уақыт режимінде алуға мүмкіндік беретін 20 жылжымалы экологиялық станцияны сатып алу мәселесі қаралды, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Қазіргі таңда Алматыда 16 стационарлық бақылау бекеті жұмыс істейді. Алайда олардың мүмкіндіктері шаһар аумағын толық қамтуға және ластанудың жергілікті көздерін жедел анықтауға жеткіліксіз. Жаңа жылжымалы станция қаланың кез келген нүктесіне орналастырылып, ауа сапасының нашарлауына қандай факторлар әсер ететінін анықтауға көмектеседі.
Атап айтқанда, көлік қозғалысының қарқындылығы, өндіріс орындарының қызметі немесе қатты отынды пайдалану сияқты себептерді айқындауға мүмкіндік береді. Жиналған деректер экология, қоғамдық көлікті дамыту, газдандыру және зиянды шығарындыларды азайту салаларында алдағы шешімдерді қабылдауға негіз болады. Сонымен қатар, бұл станциялар жүзеге асырылып жатқан экологиялық жобалардың тиімділігін бағалауға және Алматыдағы ауа сапасын жақсарту бойынша нақты әрі тиімді шараларды қабылдауға мүмкіндік береді.