Алматының Түрксіб ауданы әкімдігінде қоғамдық тамақтану орындары, өндірістік базалар және өзге де ұйымдардың өкілдерімен кездесу өтті. Жиында атмосфералық ауаны қорғау және қолданыстағы экологиялық талаптарды сақтау мәселесі қаралды, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Іс-шараға Алматы қаласының Экология және қоршаған орта басқармасы мен «Eco Almaty» ЖШС өкілдері қатысты.
Кәсіпкерлерге атмосфералық ауаны қорғау қағидалары мен қоршаған ортаға келетін кері әсерді азайту шаралары түсіндірілді. Сондай-ақ экологиялық талаптарды кәсіпкерлік қызмет барысында қолдану тетіктері талқыланды.
Алматыда ауа сапасын жақсарту бағытындағы жұмыстар жүйелі түрде жалғасуда. Оның аясында жеке тұрғын үй секторын газдандыру, энергетикалық нысандарды жаңғырту және экологиялық таза қоғамдық көлікті дамыту шаралары жүзеге асырылуда.
Есептеулерге сәйкес, Алматы агломерациясындағы шығарындылар көлемі жылына 225 мың тоннаға жетеді. Оның басым бөлігі Алматы қаласының үлесіне тиесілі. Ауа ластануының негізгі көзі – автокөлік, оның үлесі шамамен 60 пайыз болады.
Кездесу барысында Түрксіб ауданында әлі де газдандырылмаған 108 тұрғын үй бар екені айтылды. Жалпы қала бойынша жеке секторды газдандыру деңгейі 99,4 пайызға жеткен.
Сонымен қатар қалада қоғамдық көлік паркін жаңарту жұмыстары жүргізілуде. Дизельді автобустарды сатып алу тоқтатылып, ірі энергетикалық көздерді экологиялық таза отын түрлеріне көшіру жалғасуда.
Мұндай кездесулер мемлекеттік органдар мен бизнес арасындағы өзара іс-қимылды нығайтып, қаладағы экологиялық жағдайды бірлесіп жақсартуға мүмкіндік береді.