23 жастағы Алматылық Бекарыс Әлімнұр кейуанаға таксиде қалдырылған 1,5 млн теңге ақшасы мен алтын бұйымдарын қайтарып берді, - деп хабарлайды Tengrinews.kz тілшісі.
19 қыркүйек күні Бекарыс Әлімнұр Алматыда екі қарияны үйіне алып барған. Кейінірек жас жігіт жолаушылардың ақшасы мен құнды әшекейлері бар чемодан қалдырғанын білген. Кейуананың реакциясын түсірген видео әлеуметтік желілерде таралды.
"Онда 1,5 миллион теңге және алтын бұйымдар болды. 11 күн осы заттардың иесін іздедім. Көрсетілген мекен-жай бойынша келіп, барлық көршілерден сұрадым. Нәтижесінде бүгін таңертең иесін тауып, ақша мен бұйымдарды қайтардым. Менің ойымша, егер барлық адам осылай жасаса, біздің еліміздің болашағы жарқын болатын еді. Ата-анам бірден ақшаны қайтару керек екен, кейбір достарым мен таныстарым жұмсасашы деген ойларын айтты. Ақшаны иесіне бергеніме қуаныштымын", - деді 23 жастағы жігіт.
Алматылықтардың айтуынша, әйелдер ақшаның табылатынына үміттерін үзген.
"Әженің өзі ол жерде қанша ақша болғанын білмейді екен. Шамасы, бір нәрсеге, мүмкін емделуге жинаған болар. Қуаныштан әже мені қатты құшақтады. Тіпті біраз жылады. Ол басқа адамдардың заттарын қажет етпейтінін айтты. Әже маған ақша ұсынды, бірақ мен бас тарттым, ештеңе алмадым. Мені 10 рет шайға шақырды", - деп бөлісті ол.
Оның айтуынша, видео әлеуметтік желілерге туыстар тобынан таралған. Видеоны әпкесі түсіріп, тар тобына жіберген. Жігіт бұл туралы біреудің білгенін қаламағанын айтты.
"Мен оның түсіріп тұрғанын білмедім. Содан кейін ол видео туыстардың тобына жіберілген, содан кейін ол таралды", - деді жігіт.
Бекарыс Әлімнұр техника-экономикалық колледжде оқыған. Қазір жиһаз компаниясында менеджер болып жұмыс істейді. Бос уақытында такси жүргізушісі болып қосымша ақша табады.