Батыс Қазақстан облысының Орал қаласына қарасты Шыңғырлау ауданында жас отбасылар арасында салауатты өмір салтын насихаттап, үлгі етуді мақсат еткен спорттық спартакиада ойыны өткізілді. Қазақстан Республикасы Тәуелсіздігінің 30 жылдығына орай Шыңғырлау аудандық ішкі саясат бөлімінің ұйымдастыруымен және Шыңғырлау аудандық Жастармен жұмыс жөніндегі ресурстық орталығының қолдауымен «Толағай» отбасылар арасындағы эстафеталық жарысы өтті, деп хабарлайды kazlenta.kz.
Л.Қылышев атындағы жалпы орта білім беретін мектебінде өткізілген жарысқа мұғалімдердің отбасыларынан құралған 5 отбасы қатысып, түрлі кезеңдерде бақ сынасты.
Отбасылар арасында ұйымдастырылған шара мақсаты дені сау, белсенді отбасы құндылығын қалыптастыру, салауатты өмір салтын ұстануға назар аудартып, дене тәрбиесін насихаттау болып табылады. Жарысқа 1-2 сынып оқушыларынан құралған 5 отбасы қатысып, 8 кезең бойынша сынға түсті. Аталмыш сайыста ата-аналар балаларымен бірге қимылдап, бір-бірін тез түсіну, жылдамдық, ептілік сынды қасиеттер бойынша жарысты.Тартысты әрі қызықты ойын қорытындысы бойынша Ғазизовтар отбасы 1 орынды иеленіп, жеңімпаз атанды. Жүлделі 2 орынды Бакытжановтар отбасы қанжығаласа, 3 орынға Махметовтар отбасы ие болды. Ойын барысында жақсы ойын өрнегін көрсеткендері үшін Исагалиевтер мен Завьяловтар отбасы белсене қатысқандары үшін арнайы алғыс хатпен марапатталды. Жарыс соңында Шыңғырлау аудандық Жастармен жұмыс жөніндегі ресурстық орталығының демеушілігімен барлық қатысқан отбасыларға диплом және бағалы сыйлықтар табыс етілді.
Жарысқа қатысушы отбасылар жоғарғы деңгейде өткізілген жарысқа атсалысқан барлық ұйымдастырушыларға, қатысқан отбасыларға және мектеп әкімшілігіне алғыстарын білдірді. Ұйымдастырушылар осы сынды додалар мен шаралардың өз жалғасын табатынын жеткізді.