Орал қаласында Қазақстан Республикасы Тәуелсіздігінің 30 жылдығына және Қажымұқан Мұңайтпасұлының 150 жылдық мерейтойына арналған ұлттық спорт түрлерінен «Ұлы дала рухы» республикалық фестивалінің аймақтық іріктеу жарысы оздырылды, деп хабарлайды kazlenta.kz.
Батыс аймақтық іріктеу жарысында 2000-2006 жылы туылған спортшылар бақ сынасты. Ұлттық спорттың жеті түрінен бсынға түскен жарысқа БҚО, Маңғыстау, Атырау, Ақтөбе және Қызылорда облыстарының жастары қатысты. Ұлттық спорт түрлерінен облыстық балалар - жасөспірімдер спорт мектебі орналасқан Асан ауылында ат спорты түрлерінен жарыстар өтіп, нәтижесінде Батыс Қазақстан облысының спортшылары Теңге ілуден жеңімпаз атанды. Жеңімпаздар Елордада өтетін финалдық кезеңге жолдама алды. Тартысты ойын қорытындысы бойынша облыс аударыспақшылары қола жүлдеге ие болды. Облыс намысын қорғаған тоғызқұмалақшылар аталмыш спорт түрі бойынша 1 орынды қанжығасына байлады. Ал асық ату спорты бойынша БҚО командасы 3 орынға жайғасты.
Өзара жолдаманы сарапқа салып, нәтижесінде жеңіске жеткен командалар Нұр-Сұлтанда өтетін финалдық кезеңде бақ сынайтын болады.
Елімізде ұлттық спорт түрлерін дамыту, салауатты өмір салтын қалыптастыру, жастарды отансүйгіштікке және патриоттыққа баулу, ең бастысы ұлттық спорт түрлерін дамытудағы ең мықты өңірді анықтау мақсатында ұйымдастырылып отырған фестиваль маңыздылығы жоғары.
Еліміз қашаннан да өзіне тән ұлттық құндылықтарымен ерекшеленеді. Оның ішінде ұлттық спорт түрлері де бар. Жеті қазынаның бірі саналатын жылқыдай жануардың өзімен өткізілетін бірнеше спорт түрлері халық арасында кеңінен танымал. Ат спортымен шүғылдану кез-келгеннің қолынан келе бермейтіні барлығымызға аян. Көкпар, теңге ілу, аударыспақ сынды ұлттық ойындар ерлерді төзіміділікке, қайсарлыққа баулиды. Ат жалын тартып мінген спортшы қашаннан өжеттілік пен дәлдікті үлгі етеді. Осы орайда аталмыш спорт түрлерінен спорттық ойындар ұйымдастырып, жастар арасында рухани байлығымызды дәріптеу мақсатында және қызығушылығын арттыру үшін осы сынды шаралардың жиі өткізілуі маңызды. Ұлттық спорттың мәртебесін асқақтату – барлығымызға міндет.
Орал қаласы