Қыркүйектің 11 жұлдызы Орал қаласының әкімінің жүлдесіне арналған Республикалық Жайдарман фестивалі оздырылды. Орал қалалық ішкі саясат бөлімінің қолдауымен, «ЖасДем» жастар қоғамдық бірлестігінің ұйымдастыруымен өткізілген шараға еліміздің түрлі облыстары мен қалаларынан қонақ командалар келді. Аталмыш шарада Республикалық жайдарман жоғары және премьер лига сайыстарының жұлдызды қонақтары мен облысымызда танымал командалар өнер көрсетіп, қала күні мерекесіне орай өз әзілдерін сыйлады. Сонымен қатар, 10 қыркүйек күні күні БҚО-ның 12 ауданының арасында оздырылған «Мен ауылдың баласы» КТК фестивалінің финалдық бәсекесі өткізілді, деп хабарлайды kazlenta.kz.
Аталмыш ойындардың мақсаты – халыққа тек көтеріңкі көңіл-күй сыйлау ғана емес, әзіл арқылы коғам шындығын жеткізе білу, әлеуметтік мәселелерді әзіл арқылы қозғай отыра, жастарға ой салу болып табылады. Сонымен қатар, мемлекеттік тіл мәртебесін көтеріп, жастар арасында ана тілімізді насихаттауды да мақсат еткен шара жастар арасында аса қызығушылыққа ие. Орал қаласы әкімінің жүлдесіне арналған ойынға жалпы саны 13 құрама қатысты. Олардың арасында сахнаға енді шығып, қадамдарын жаңа басып жүрген командалармен қатар республикалық деңгейде өнер көрсетіп жүрген белгілі, жүлдызды топтар да болды. Аталмыш ойында Батыс Қазақстандық топтардан бөлек, Қостанай облысынан келген «Рудный» командасы, Ақтөбелік «Сөз жоқ» командасы, Атырау облысынан келген «Құтқарушылар» сынды қонақ командалар өнер көрсетті.
![](https://kaz.kazlenta.kz/uploads/posts/2021-09/1631623794_whatsapp-image-2021-09-13-at-19.03.49-1.jpeg)
Көрерменді керемет көңіл-күйге бөлеген жайдарлы ойын нәтижесі бойынша Ақтөбелік «Сөз жоқ» құрамасы 3 орынды иеленсе, Қостанай облысынан келген «Рудный» командасы 2 орынды қанжығалады. Сырым ауданынан келген «Ақырап 25» командасы аталмыш сайыстың жеңімпазы атанып, 1 орынды иеленді. Фестивальдің үздік ойыншысы аталымын Ақтөбе қаласынан келген «Сөз жоқ» құрамасының ойыншысы Жадырасынов Азамат жеңіп алды.
![](https://kaz.kazlenta.kz/uploads/posts/2021-09/1631623748_whatsapp-image-2021-09-13-at-19.03.48.jpeg)
Шара соңында Орал қаласы әкімінің орынбасары Ерлан Галиев барша командаларға алғыс білдіріп, «Қала күні» мерекесімен құттықтады. Және барша жүлдегерлер мен жеңімпаздарды Орал қаласы әкімінің жүлдесіне арналған кубокпен, алғыс хаттармен марапаттады.
Сонымен қатар 10 қыркүйек күні Орал қаласының мәдениет және тілдерді дамыту бөлімінің қолдауымен «Мен ауылдың баласы» КТК фестивалінің финалдық кезеңі өткізілген болатын. Аталмыш фестиваль облысымыздың 12 ауданында оздырылып, аудан чемпиондары анықталды. Әр аудан чемпионы облыстық финалдық кезеңге жолдама алып, бас жүлде мен Республикалық Жайдарман және КТА сайыстарына жолдама алу мүмкіндігіне ие болды.
Сайыс қорытындысы бойынша 3 орынды Тасқала ауданының «Ақтау» құрамасы еншілесе, 2 орынды Шыңғырлау ауданының «Әріптестер құрамасы» қанжығалады. Ал 1 орынға Жаңақала ауданының «Ақиқат» құрамасы, Бас жүлдеге Казталов ауданының «Қос өзен» құрамасы ие болды. Алғашқы фестивальдің қорытындысы бойынша үздік ойыншы Тасқала ауданы «Ақтау» құрамасының жас ойыншысы Сырым Саян атанды. Фестиваль соңында жеңімпаздарға бас жүлде кубогі, арнайы дипломдар мен бағалы сыйлықтар табысталды.
Орал қаласы