Елордада жол қозғалысы қауіпсіздігін қамтамасыз етуге бағытталған “Мас жүргізуші — қылмыскер!” жедел-профилактикалық іс-шарасы аясында полиция қызметкерлері рейдтік шаралар жүргізуде, — деп хабарлайды kazlenta.kz тілшісі Polisia.kz сайтына сілтеме жасап.
Іс-шараның негізгі мақсаты — жол-көлік оқиғаларының алдын алу және мас күйінде көлік басқаратын жүргізушілерді анықтау. Демалыс күндері жүргізілген тексерулер барысында қала аумағында мас күйінде көлік басқарған 10 жүргізуші анықталды. Барлық құқық бұзушылар жауаптылыққа тартылды. Мәселен, таңғы сағат 8 шамасында CHANGAN XS PLUS автокөлігі тоқтатылды. Рөлде 23 жастағы ер адам болған. Құжаттарын тексеру және жүргізушімен сөйлесу барысында полицейлер оның алкогольдік масаң күйде екенін аңғарды: одан қатты алкоголь иісі шығып, сөйлеуі анық емес болған.
Медициналық куәландыру алкоголь қолданғанын растады. Аталған дерек бойынша жүргізуші Қазақстан Республикасы әкімшілік құқық бұзушылық туралы кодексінің 608-бабы 1-бөлігіне сәйкес әкімшілік жауаптылыққа тартылды. Сот шешімімен ол 7 жыл мерзімге көлік құралын басқару құқығынан айырылып, 15 тәулікке әкімшілік қамауға алынды. Автокөлік коммуналдық тұраққа қойылды. Полиция мас күйінде көлік басқару — жол қозғалысы ережелерін өрескел бұзу және жол қозғалысына қатысушылардың өмірі мен денсаулығына тікелей қауіп төндіреді. Мұндай әрекеттер ауыр салдарға әкелуі мүмкін екенін ескертеді. Полицейлер елорда жолдарында бақылауды күшейтуді жалғастыруда. Азаматтарды жауапкершілік танытып, мас күйінде рөлге отырмауға шақырамыз.