Түрксіб ауданын жұмыс сапарымен аралау барысында Алматы әкімі Дархан Сатыбалды бірқатар нысанды көрді. Сапар соңында жұмыстың мерзімін қатаң сақтау мен сапасын қамтамасыз ету тапсырылды, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Қонаев ӨК шағынауданында 2 жастан 6 жасқа дейінгі балаларға арналған 11 топтық балабақшаның құрылысы аяқталды. Қазір жабдықтарды орнату және ғимараттарды дайындау жұмыстары қолға алынды. Алматыға кіреберістегі негізгі магистральдардың бірі – Іле трактісін кешенді көріктендіру жобасы пысықталуда. Көгалдандыру, жаңа тротуарлар мен веложолдар салу, заманауи жарықтандыру орнату және «Алматы» стеласын қою жоспарланған.
Жобаны жүзеге асыру 2027-2028 жылдарға белгіленген. Красногорская көшесінде бұрын Қорғаныс министрлігінің қарамағында болған төрт тұрғын үйдің құрылысын аяқтау жоспарланып отыр. Сонымен қатар екі апатты жағдайдағы корпус бұзылады. Олардың орнына шағынаудан қажеттіліктерін ескере отырып, жаңа әлеуметтік нысан салу көзделген. Тұрғын үйлерді аяқтау шамамен 600 пәтерді пайдалануға беруге және оларды кезекте тұрған азаматтарға үлестіруге мүмкіндік береді.