Астананың Сарайшық ауданында ашылған Мансап орталығына Қырғыз Республикасының Еңбек, әлеуметтік қамсыздандыру және көші-қон министрі Қанат Сағынбаев тәжірибе алмасу мақсатындағы ресми сапары аясында барды, деп хабарлайды kazlenta.kz тілшісі қала әкімдігінің ресми сайтына сілтеме жасап.
Бұл орталық елордадағы жаңартылған жұмыспен қамту жүйесінің бір бөлігіне айналды. Қалада барлығы үш Мансап орталығы жұмыс істейді, олардың әрқайсысы екі ауданға қызмет көрсетеді. Бұл тұрғындардың қызметті тұрғылықты жеріне жақын тұстан алуына мүмкіндік береді. Астана қаласының Еңбек мобильділігі орталығының директоры Олжас Омардың айтуынша, негізгі мақсат – жұмыспен қамту шараларына қолжетімділікті жеңілдету және халықты жұмыспен қамту деңгейін арттыру.
«Енді тұрғындарға қаланың басқа бір шетіне барудың қажеті жоқ, қызметтерді елорданың әр бөлігінен алуға болады. Барлық орталықта көрсетілетін қызмет түрлері бірдей, сондықтан кез келген азамат тұрғылықты жеріне қарамастан, қалаған орталыққа жүгіне алады.
Мансап орталығы жұмысқа орналасуға жәрдемдеседі, Enbek.kz порталымен жұмыс істеу бойынша кеңес береді, сондай-ақ мемлекеттік жұмыспен қамту бағдарламаларын жүзеге асырады. Олардың қатарында жастар практикасы, 50 жастан асқан азаматтарға арналған «Күміс жас» жобасы, қысқа мерзімді оқыту және кейін жұмысқа орналастыру мүмкіндіктері бар.
Бұдан бөлек, әлеуметтік осал топтарға қайтарымсыз гранттар қарастырылған. Қолдау көлемі 400 АЕК-ке дейін (шамамен 1,5 млн теңге) жетуі мүмкін», – деді орталық басшысы.
«Әрине, біз Қазақстан тәжірибесінің кейбір элементтерін Қырғызстанда енгізуді жоспарлап отырмыз. Қазақстан Республикасының Еңбек министрлігімен бірлесіп, әсіресе цифрландыру бағытындағы бірқатар шешімді қолданамыз. Бұл салада қазақстандық әріптестер айтарлықтай ілгерілеген. Сонымен қатар ұйымдастырушылық тәсілдер де қызығушылық тудырып отыр, оларды да өз тәжірибемізге бейімдеуге болады», – деді Қанат Сағынбаев.
Еске салайық, Астана тұрғындарының ыңғайы үшін мансап орталықтары үш мекенжайда жұмыс істейді:
• Есіл, Нұра аудандары: Достық даңғылы, 13;• Сарыарқа, Байқоңыр аудандары: Бейбітшілік көшесі, 9;
• Алматы, Сарайшық аудандары: А.Байтұрсынұлы көшесі, 29/2.