СҚО ПД есірткі қылмысына қарсы іс-қимыл басқармасының қызметкерлері 19 жастағы петропавлдықты ұстады. Ол облыс орталығы аумағында синтетикалық есірткі заттарын таратты деген күдікке ілінді, – деп хабарлайды kazlenta.kz тілшісі Polisia.kz сайтына сілтеме жасап.
Ұстау кезінде жас жігіттен ұнтақ тәрізді заты бар 19 орама тәркіленді. Сараптама нәтижесінде оның α-PVP деп аталатын психотроптық зат екені анықталды. Тәркіленген заттың салмағы 35 грамды құрады. Қазіргі уақытта сотқа дейінгі тергеп-тексеру жүргізіліп жатыр.
Полиция мәліметінше, күдікті тыйым салынған заттарды сатумен айналысатын интернет-дүкендердің біріне бір айдан аспайтын уақыт бұрын жұмысқа тұрған. Қазір ол қамауда отыр. Есірткі заттарын аса ірі мөлшерде өткізу фактісі бойынша оған 7 жылдан 12 жылға дейін бас бостандығынан айыру жазасы қаупі төніп тұр. Жыл басынан бері облыс аумағында полиция қызметкерлері заңсыз айналымнан 350 грамнан астам синтетикалық есірткі тәркіледі.