Алматы әкімі Дархан Сатыбалды қаланың негізгі аумақтарындағы көше және сәулеттік жарықтандырудың жай-күйін тексерді, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Тексеру барысында әл-Фараби даңғылы – Достық даңғылы қиылысындағы діңгек тіректер, «Қазақстан» қонақ үйінің сәулеттік жарықтандырылуы, Сүйінбай даңғылының, Бекмаханов пен Майлин көшелерінің жарықтандырылуы, сондай-ақ Бұқтырма көшесіндегі ағаштардың сәндік жарығы қаралды.
2025 жылы Алматыда жарықтандырылған көше мен қоғамдық кеңістіктердің саны айтарлықтай артты. Жарық желілері мен шамдарға ауқымды жаңғырту жүргізіліп, бірқатар маңызды нысан сәулеттік жарықпен толықтырылды. Соның нәтижесінде жарықтандыруға қатысты тұрғындардан түсетін өтініш екі есеге жуық қысқарды. Бұл жүйенің сенімділігі мен сапасының артқанын көрсетеді.2026 жылы жаңғырту жұмыстары жалғасады. Тозығы жеткен жабдықтар кезең-кезеңімен жаңартылып, жарықтандырудың бір бөлігі көзге жайлы жылы түсті жарыққа көшіріледі. Сондай-ақ, қала ғимараттарын сәулеттік жарықтандыру ауқымы кеңейтіледі.