Алматы әкімі Дархан Сатыбалды шаһардағы сыртқы жарық беру жүйесін жаңғырту жұмыстарының барысымен танысты. Қала басшысы Көктөбедегі шолу алаңынан жарықтандыру жаңартылып жатқан аумақтарды көріп шықты, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
«Алматы Қала Жарық» МКК мәліметінше, 2025 жылдың бес айында қалада 13 мыңнан астам шам ауыстырылып, 120 шақырым жарық желісі қалпына келтірілген. Сондай-ақ, 520 сыртқы жарықтандыру басқару шкафы жаңартылып, бұрын жарық болмаған аймақтарға жаңа желілер тартылды. Бұған қоса, магистралды көшелерде желілерді жаңғырту және сәулеттік жарық беру жобалары қолға алынған. Жабдықты орнатуға күн сайын 40-тан астам арнайы мамандандырылған бригада тартылады.Дархан Сатыбалды сыртқы жарықтандыру қарқынын арттыруды жүктеді. Әсіресе, мектеп, емхана, мәдени нысан мен қоғамдық көлік аялдамасына баратын жолдар басты назарда болуы қажет,-деді ол.Қала көшелерін жарықтандыруда сапа мен қолжетімділікті арттыру жұмыстары әлі де жалғаса береді.
