Елорданың коммуналдық қызметі күшейтілген, үздіксіз жұмыс режимінде қызметін жалғастырып жатыр, деп хабарлайды kazlenta.kz тілшісі қала әкімдігінің ресми сайтына сілттеме жасап.
Түнгі ауысым барысында коммуналдық қызмет өкілдері қала аумағынан 1102 жүк көлігі рейсімен шамамен 15 мың текше метр қарды шығарып үлгерді. 18 желтоқсан күні таңертеңнен бастап қар күреу жұмысына 3 мыңнан астам жол жұмысшысы мен 1 300-ден астам арнайы техника жұмылдырылды. Қыс маусымы басталғалы бері елордадан қар полигондарына 56 092 жүк көлігінің рейсімен 722 мың текше метрден астам қар шығарылды. Алдымен негізгі көше магистральдары мен қоғамдық көлік бағыттары тазаланады. Одан кейін қозғалыс қарқыны орташа аумақтарда – аулаларда, алаңдарда, тротуарлар мен аялдамаларда жұмы жүргізіледі.
Қала тұрғындарының қауіпсіз жүруін қамтамасыз ету мақсатында жолдарға, тротуарлар мен көшелерге техникалық тұз себіліп жатыр. Сонымен қатар, аула аумақтарындағы тазалықты қамтамасыз ету ПИК пен МИБ-тің міндеті екені еске салынады. Олар тұрғындардың қауіпсіздігі мен қолайлылығы үшін аулаларды қар мен мұздан уақытылы тазалауы тиіс. Астана қаласының әкімдігі тұрғындар мен қала қонақтарын қауіпсіздік ережелерін сақтауға, жолдар мен тротуарларда барынша сақ болуға, сондай-ақ қолайсыз ауа райы кезінде алыс жолға шықпауға шақырады.