Алматы метрополитені бүгін өзінің 14 жылдық мерейтойын атап өтуде. 2011 жылы іске қосылған сәттен бастап метро қаланың ең маңызды және сұранысқа ие көлік жүйелерінің біріне айналды. Осы уақыт ішінде метро қызметін 200 миллионнан астам жолаушы пайдаланған, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Қазіргі таңда күн сайын 120 мыңнан астам қала тұрғыны мен қонағы метроның жылдам, қауіпсіз және қолайлы қызметіне жүгінеді. Жүйенің үздіксіз әрі тұрақты жұмысын 1 500-ден астам маманқамтамасыз етіп отыр.
Алматы метросы соңғы жылдары белсенді даму кезеңіне өтті. «Қалқаман» бекетінің құрылысы аяқталуға жақын, бұл батыс бағыттағы жолаушылар ағынын айтарлықтай жеңілдетпек. Сонымен қатар, осы бағытта тағы үш жаңа бекеттің жобалау жұмыстары басталды.
Қала тұрғындары үшін заманауи, экологиялық таза және жедел қоғамдық көлік ретінде метроның маңызы жыл сайын артып келеді.