Астанада қар тазалау жұмысы тәулік бойы жалғасып жатыр. Күн сайын мыңдаған жол жұмысшысы мен арнайы техника көшелер мен аулаларды қардан тазартады, деп хабарлайды kazlenta.kz тілшісі елорда әкімдігінің ресми сайтына сілтеме жасап.
7 қараша күні қала аумағынан полигондарға 1 011 рейспен 12 079 текше метр қар шығарылды.
8 қарашаға қараған түні қар тазалау жұмысына 448 жол жұмысшысы мен 1 098 арнайы техника жұмылдырылады.
Қысқы кезең басталғалы бері елордадан жалпы көлемі 38 мың текше метрден астам қар 3 143 рейспен шығарылды.
Алдымен негізгі магистральдар мен қоғамдық көлік бағыттары тазартылады. Кейіннен орташа қозғалыс бар учаскелер – аулалар, алаңдар, тротуарлар мен аялдамалар тазаланады.
Астана әкімдігі қала тұрғындары мен қонақтарын қауіпсіздік ережелерін сақтауға, жолдар мен тротуарларда мұқият болуға, сондай-ақ ауа райы қолайсыз кезде алыс сапарға шықпауға шақырады.