Мұнайлы ауданының Дәулет ауылында ангар типіндегі заманауи спорт кешені пайдалануға берілді. Салтанатты шараға Маңғыстау облысының әкімі Нұрдәулет Қилыбай, ҚР Парламенті Мәжілісінің депутаты Еділ Жаңбыршин, «Самұрық-Қазына» АҚ басқарушы директоры Ғибрат Ауғанов және ауыл тұрғындары қатысты, деп хабарлайды kazlenta.kz тілшісі Маңғыстау облысы әкімінің баспасөз қызметіне сілтеме жасап.
Аталған спорт зал ауыл жастары мен тұрғындарының салауатты өмір салтын ұстануына және бұқаралық спортты дамытуға мүмкіндік береді. Жалпы ауданы 851,5 шаршы метр болатын ангар типіндегі спорт кешенінде күрес, карате, волейбол, фитнес және өзге де спорт түрлерімен айналысуға арналған залдар, жаттықтырушылар бөлмелері мен киім ауыстыратын бөлмелер қарастырылған. Нысан барлық заманауи талаптарға сай жабдықталған. Жоба «Самұрық-Қазына» АҚ қаражаты есебінен салынды.Салтанатты ашылу рәсімінде облыс әкімі Нұрдәулет Қилыбай тұрғындарды жаңа спорт залдың ашылуымен құттықтап, нысанның ауыл жастары үшін маңыздылығын атап өтті.
«Мемлекет басшысы Қасым-Жомарт Тоқаев бұқаралық спортты дамыту мен жастарды салауатты өмір салтына баулуға ерекше көңіл бөлуді тапсырған болатын. Бүгін ашылып отырған бұл спорт кешені – осы бағыттағы нақты нәтижелердің бірі. Мұндай нысандар ауыл жастарының бос уақытын тиімді өткізіп, спортқа деген қызығушылығын арттырады, жаңа чемпиондардың қалыптасуына жол ашады», – деді аймақ басшысы.